ജമ്മു കശ്മീരിലെ ബാല്‍താലില്‍ മണ്ണിടിച്ചിലില്‍ പെട്ട് അഞ്ച് പേര്‍ മരിച്ചു. മരിച്ചവര്‍ ആരൊക്കെയാണെന്ന് തിരിച്ചറിഞ്ഞിട്ടില്ല. അമര്‍നാഥിലേക്കുള്ള പാതയില്‍ റയില്‍പത്രിക്കും ബ്രാരിമാര്‍ഗിനും ഇടയ്ക്കാണ് സംഭവം. അമര്‍നാഥിലേക്ക് തീര്‍ത്ഥാടനത്തിന് പോയ സംഘത്തിലെ ആളുകളാണ് മരിച്ചത്. മൂന്ന് പേര്‍ക്ക് പരിക്കേറ്റിട്ടുണ്ട്. പരിക്കേറ്റവരില്‍ ഒരാളുടെ നില ഗുരുതരമാണ്. ഈ വര്‍ഷം ഇതുവരെ 11 അമര്‍നാഥ് തീര്‍ഥാടകരാണ് മരിച്ചത്.
ഇതുവരെ 36,366 തീര്‍ത്ഥാടകരാണ് അമര്‍നാഥ് സന്ദര്‍ശനത്തിനായി ഈ വര്‍ഷം എത്തിയത്. കനത്ത സുരക്ഷയാണ് ഇവിടെ ഒരുക്കിയിരിക്കുന്നത്. സംഭവസ്ഥലത്ത് റോഡില്‍നിന്ന് മണ്ണ് മാറ്റാനുള്ള ശ്രമങ്ങള്‍ തുടങ്ങിതായി സുരക്ഷാ ഉദ്യോഗസ്ഥര്‍ അറിയിച്ചു. മനസാ സരോവര്‍ സന്ദര്‍ശിക്കാനെത്തിയ ഒരു മലയാളി സ്ത്രീയും കഴിഞ്ഞ ദിവസം മരിച്ചിരുന്നു. ശ്വാസ തടസ്സത്തെ തുടര്‍ന്നാണ് ഇവരും മരിച്ചത്. വണ്ടൂര്‍ കിടങ്ങഴി മന കെ.എം സേതുമാധവന്‍ നമ്ബൂതിരിപ്പാടിന്റെ ഭാര്യ ലീലാ അന്തര്‍ജനം ആണ് മരിച്ചത്. കൈലാസയാത്ര കഴിഞ്ഞ് മടങ്ങുമ്ബോള്‍ ചൈന അതിര്‍ത്തിയില്‍ വെച്ചായിരുന്നു മരണം.
