തിരുവനന്തപുരം: വനിതാ മതില്‍ വര്‍ഗീയമതിലാണെന്നും ഇത് കേരളത്തിന് വിനാശമാണ് വരുത്താന്‍ പോകുന്നതെന്നും പ്രതിപക്ഷ നേതാവ് രമേശ് ചെന്നിത്തല. വിദ്വേഷത്തിന്‍റെയും വെറുപ്പിന്‍റെയും വിഭാഗീയതയുടെയും സന്ദേശമാണ് വനിതാ മതില്‍ നല്‍കുന്നതെന്നും അദ്ദേഹം വ്യക്തമാക്കി. സ്വകാര്യചാനലിന് നല്‍കിയ അഭിമുഖത്തിലാണ് അദ്ദേഹം ഇക്കാര്യങ്ങള്‍ വ്യക്തമാക്കിയത്.
ജനങ്ങളെ ഭിന്നിപ്പിക്കാനാണ് സര്‍ക്കാരിന്‍റെ നടപടികള്‍ ഇടയാക്കിയിരിക്കുന്നത്. വനിതാ മതില്‍ പാര്‍ട്ടി പരിപാടിയാണ് അതിന് വേണ്ടി സര്‍ക്കാര്‍ സംവിധാനങ്ങളെ ദുരുപയോഗം ചെയ്യുന്നു. പൊതു ഖജനാവില്‍ നിന്നും പണം ചെലവഴിക്കുന്നു. ജനങ്ങളെ ഭീഷണിപ്പെടുത്തിയാണ് വനിതാ മതിലിന് ആളുകളെ കൂട്ടുന്നത്.
ശനിയാഴ്ച ദിവസങ്ങളില്‍ പോലും സ്കൂളുകള്‍ക്ക് അവധി നല്‍കാതെ അധ്യാപകരോട് ക്ലാസെടുക്കാന്‍ നിര്‍ദേശിച്ചിരുന്ന സര്‍ക്കാര്‍ ഇന്ന് സ്കൂളുകള്‍ക്ക് അവധി നല്‍കിയിരിക്കുകയാണ്. സ്കൂള്‍ മാനേജ്മെന്‍റുകളെയും ജനങ്ങളെയും വനിതാ മതിലിന്‍റെ പേരില്‍ ഭീഷണിപ്പെടുത്തുകയാണ്.
ലോകത്ത് മതിലുകള്‍ പൊളിയ്ക്കാന്‍ ശ്രമിക്കുകയാണ്. ഇവിടെ മതില്‍ തീര്‍ത്ത് വിഭാഗീയത സൃഷ്ടിക്കുകയാണെന്നും അദ്ദേഹം പറഞ്ഞു. തൊഴിലുറപ്പ്, കുടുംബശ്രീ പ്രവര്‍ത്തകരെ ഭീഷണിപ്പെടുത്തുകയാണ് സര്‍ക്കാര്‍ ചെയ്യുന്നത്. പാര്‍ട്ടി പരിപാടിക്ക് വേണ്ടി സര്‍ക്കാര്‍ സംവിധാനങ്ങളെ ദുരുപയോഗം ചെയ്യുന്നത് തെറ്റായ പ്രവണത ഉണ്ടാക്കും. കേരളത്തിലെ ഭൂരിപക്ഷം ജനങ്ങളും മതിലിനെതിരാണെന്നും അദ്ദേഹം പറഞ്ഞു.
