തിരുവനന്തപുരം: നടന്‍ മധുവിന്റെ 86ാം ജന്മദിനാഘോഷവും ആദരിക്കല്‍ ചടങ്ങും ഇന്നലെ പ്രസ്‌ക്ലബ്ബിൽ 'മധു മധുരം തിരുമധുരം' എന്ന പേരില്‍ നടന്നു . പ്രസ്‌ക്ലബ്ബിന്റെ നേതൃത്വത്തില്‍ നടന്ന ചടങ്ങ് സാംസ്‌ക്കാരിക മന്ത്രി എ കെ ബാലന്‍ ഉദ്ഘാടനം ചെയ്തു. മലയാള സിനിമയിൽ വ്യത്യസ്തമായ വേഷങ്ങളിലൂടെ ജനമനസുകള്‍ കീഴടക്കിയ അപൂര്‍വ്വ പ്രതിഭയാണ് മധുവെന്ന് അദ്ദേഹം പറഞ്ഞു. പ്രസ് ക്ലബ്ബിന്റെ സ്‌നേഹോപഹാരം അദ്ദേഹം മധുവിന് സമ്മാനിച്ചു. അടൂര്‍ ഗോപാലകൃഷ്ണന്‍ മധുവിനെ പൊന്നാട ചാര്‍ത്തി. ജന്‍മദിനത്തിന് പ്രസ്‌ക്ലബ്ബ് ഒരുക്കിയ കേക്ക് മധു മുറിച്ചു.
മധുവിനെക്കുറിച്ചുള്ള www.madhutheactor.com എന്ന വെബ്സൈറ്റിന്റെ സ്വിച്ച് ഓണ്‍ കര്‍മ്മം സംവിധായകനും ഗാനരചയിതാവുമായ ശ്രീകുമാരന്‍ തമ്പി നിര്‍വ്വഹിച്ചു. മധുവിനെ ആദരിച്ച ചടങ്ങില്‍ എംഎല്‍എ മാരായ മുകേഷ്, വിഎസ് ശിവകുമാര്‍, ഒ രാജഗോപാല്‍, സംവിധായകരായ ഷാജി എന്‍ കരുണ്‍, ടികെ രാജീവ് കുമാര്‍, അമ്പിളി, കെ മധു, സുരേഷ് ഉണ്ണിത്താന്‍, നിര്‍മ്മാതാക്കളായ രഞ്ജിത്, ദിനേശ് പണിക്കര്‍ മുതലായവർ പങ്കെടുത്തു.
