ന്യൂഡല്‍ഹി: ആര്‍ ജെ ഡി നേതാവ് ലാലു പ്രസാദ് യാദവിനെ ഡിസ് ചാര്‍ജ്ജ് ചെയ്ത് ഓള്‍ ഇന്ത്യ ഇന്‍സ്റ്റിറ്റ്യൂട്ട് ഓഫ് മെഡിക്കല്‍ സയന്‍സ്. തനിക്ക് എയിംസില്‍ തന്നെ തുടര്‍ന്നാല്‍ മതിയെന്ന നിലപാടിലാണ് ലാലു പ്രസാദ്. ലാലുവിന്റെ അനുയായികളും ആശുപത്രി അധികൃതരും തമ്മില്‍ ഇക്കാര്യത്തില്‍ വാക്കേറ്റമുണ്ടായി. ലാലുവിന്റെ അനുയായികള്‍ക്കെതിരെ എയിംസ് പോലീസില്‍ പരാതി നല്‍കി. പ്രമേഹ സംബന്ധിയായ രോഗങ്ങളെ തുടര്‍ന്ന് എയിംസില്‍ ചികില്‍സ തേടി എത്തിയതായിരുന്നു ലാലു.
എന്നാല്‍ ഇപ്പോള്‍ രോഗാവസ്ഥയില്‍ മാറ്റം വന്നിട്ടുണ്ടെന്നും അതിനാല്‍ റാഞ്ചിയിലെ ആശുപത്രിയില്‍ ചികില്‍സിച്ചാല്‍ മതിയെന്നുമാണ് ഡോക്ടര്‍മാരുടെ പക്ഷം.കാലിതീറ്റ കുംഭകോണ കേസില്‍ ജയില്‍ ശിക്ഷ അനുഭവിക്കുന്നതിനിടയിലാണ് ലാലു യാദവിനെ എയിംസില്‍ പ്രവേശിപ്പിച്ചത്. ഇപ്പോള്‍ റാഞ്ചിയിലെ രാജേന്ദ്ര ഇന്‍സ്റ്റിറ്റ്യൂട്ട് ഓഫ് മെഡിക്കല്‍ സയന്‍സിലേയ്ക്കാണ് ലാലുവിനെ റെഫര്‍ ചെയ്തിരിക്കുന്നത്.
