മുംബൈ: പ്രമുഖ മാധ്യമപ്രവര്‍ത്തകന്‍ ജ്യോതിര്‍മയി ഡേ (ജേഡെ) വധക്കേസില്‍ ഒമ്പത് പ്രതികള്‍ക്കും ജീവപര്യന്തം. സി.ബി.ഐ പ്രത്യേക കോടതിയാണ് ശിക്ഷ വിധിച്ചത്. പ്രതികളായ ഛോട്ടാരാജന്‍, സഹായി രോഹിത് തങ്കപ്പന്‍ എന്ന സതീഷ് കലിയ, അനില്‍ വാഗ്മോദ്, അഭിജീത് ഷിന്‍ഡേ, നിലേഷ് ഷഡ്ജെ, അരുണ്‍ ധാക്കെ, മങ്കേഷ് അഗവനെ, സചിന്‍ ഗെയ്ക്ക്വാദ്, ദീപക് സിസോദിയ എന്നിവരും നേരത്തെ മരിച്ച വിനോദ് അസ്രാണി എന്നിവരെയാണ് ശിക്ഷിച്ചത്.
ഛോട്ടാ രാജന്റെ സഹായികളായ സതീഷ് കലിയ, അനില്‍ വാഗ്മോദ്, അഭിജീത് ഷിന്‍ഡേ, നിലേഷ് ഷഡ്ജെ, അരുണ്‍ ധാക്കെ, മങ്കേഷ് അഗവനെ, സചിന്‍ ഗെയ്ക്ക്വാദ് എന്നിവര്‍ ഡേയെ പിന്തുടരുകയും ഷാര്‍പ് ഷൂട്ടറായ കലിയ വെടിവെക്കുകയും ചെയ്തുവെന്നാണ് പ്രൊസിക്യുഷന്‍ കേസ്. കേസില്‍ പ്രതിയായിരുന്ന മാധ്യമപ്രവര്‍ത്തക ജിഗ്ന വോറ ഉള്‍പ്പെടെ രണ്ടുപേരെ കോടതി വെറുതെ വിട്ടു.
ഏഴു വര്‍ഷം മുമ്പാണ് 56കാരനായ ജെ ഡേ മിഡ് ഡേ എന്ന സായാഹ്ന പത്രത്തിന്റെ എഡിറ്ററായിരുന്നു. 2011 ജൂണ്‍ 11ന് സ്വവസതിക്ക് സമീപമാണ് വെടിയേറ്റ് മരിച്ചത്. മറ്റൊരു മാധ്യമത്തില്‍ പ്രവര്‍ത്തിക്കുന്ന മാധ്യമ പ്രവര്‍ത്തക ജിഗ്ന വോറയുടെ പ്രേരണയില്‍ ഛോട്ടാരാജന്റെ നിര്‍ദേശ പ്രകാരമാണ് കൃത്യം നടത്തിയതെന്നായിരുന്നു പ്രൊസിക്യൂഷന്‍ വാദം. വെറുതെ വിട്ട പോള്‍സണ്‍ ജോസഫും കുറ്റക്കാരനാണെന്ന് കണ്ടെത്തിയ സതീഷ് കലിയയും മലയാളികളാണ്.
