അമര്‍ അക്ബര്‍ ആന്റണി, കട്ടപ്പനയിലെ ഋതിക്ക് റോഷന്‍ എന്നി സൂപ്പര്‍ ഹിറ്റ് ചിത്രങ്ങള്‍ക്കു ശേഷം നാദിര്‍ഷാ സംവിധാനം ചെയ്യുന്ന ചിത്രമാണ് മേരാ നാം ഷാജി. മൂന്നു ഷാജിമാരുടെ കഥയാണ് ചിത്രം പറയുന്നത്. ബിജു മേനോന്‍ കഥാപാത്രമായ ഷാജി കോഴിക്കോട്ടെ ഒരു ഗുണ്ടയാണ്. ബൈജു തിരുവനന്തപുരത്തെ ഷാജിയെന്ന ടാക്സി ഡ്രൈവറാണ്. അസിഫ് ചെയ്യുന്ന കഥാപാത്രം കൊച്ചിയില്‍ തരികിട നടത്തി ജീവിക്കുന്ന ഉഡായിപ്പ് ഷാജിയാണ്.
ഈ മൂന്നു കഥാപാത്രങ്ങളും കൊച്ചിയില്‍ അകസ്മികമായി കണ്ടുമുട്ടുന്നു. തുടര്‍ന്നുണ്ടാകുന്ന സംഭവവികാസങ്ങളാണ് ചിത്രം പറയുന്നത്. ഇടയ്ക്ക് സിനിമ ത്രില്ലര്‍ മൂഡിലേക്കും പോകുന്നുണ്ട്. നിഖില വിമല്‍, ഗണേഷ് കുമാര്‍, ശ്രീനിവാസന്‍ ,ധര്‍മ്മജന്‍ , ജി സുരേഷ്‌കുമാര്‍ ,ആഷാ അരവിന്ദ്, സാദിഖ് , അരുണ്‍ പുനലൂര്‍ തുടങ്ങിയവരാണ് മറ്റു കഥാപാത്രങ്ങളെ അവതരിപ്പിച്ചിരിക്കുന്നത്.
വര്‍ഷങ്ങളായി മലയാളസിനിമയില്‍ ഉണ്ടൈങ്കിലും വേണ്ട വിധം ഉപയോഗിക്കാത്ത ഒരു നടനാണ് ബൈജു. ഈ സിനിമയിലെ പ്രധാനകഥാപാത്രങ്ങളില്‍ ഒന്നായ നിഷ്‌കളങ്കനായ ഷാജിയായി ബൈജു തിളങ്ങി. നിരവധി നര്‍മ്മമുഹൂര്‍ത്തങ്ങള്‍ സമ്മാനിക്കുന്ന ചിത്രം ബോറടിയില്ലാതെ സാധാരണപ്രേക്ഷകര്‍ക്ക് കണ്ടിരിക്കാവുന്ന ചിത്രമാണ്. നവാഗതനായ എമില്‍ മുഹമ്മദാണ് ചിത്രത്തിന്റെ സംഗീതം നിര്‍വഹിച്ചിരിക്കുന്നത്.ചിത്രത്തിന്റെ കാമറ വിനോദ് ഇല്ലംപിള്ളിയാണ്. യൂണിവേഴ്സല്‍ സിനിമാസിന്റെ ബാനറില്‍ ബി.രാകേഷാണ് ചിത്രം നിര്‍മ്മിച്ചിരിക്കുന്നത്.
