വടക്കഞ്ചേരി: ജില്ലാപഞ്ചായത്തിന്റെ നേതൃത്വത്തില്‍ പാലക്കുഴി തിണ്ടില്ലം വെള്ളച്ചാട്ടം പ്രയോജനപ്പെടുത്തി നടപ്പിലാക്കുന്ന മിനി ജലവൈദ്യുത പദ്ധതിക്കായി ചെക്ക്ഡാം നിര്‍മാണം തുടങ്ങി. തിണ്ടില്ലം വെള്ളച്ചാട്ടത്തിനു മുകള്‍ഭാഗത്ത് തോടിന് കുറുകെയാണ് തടയണ കെട്ടുന്നത്. ഡാം നിര്‍മിക്കുന്ന സ്ഥലത്തെ പാറ പൊട്ടിച്ച് നീക്കി ഡാമിന്റെ അടിത്തറ പണിയാനുള്ള കോണ്‍ക്രീറ്റിങ്ങാണ് ഇപ്പോള്‍ നടക്കുന്നത്. കൊന്നയ്ക്കല്‍കടവില്‍ പവര്‍ ഹൗസിന്റെ ജോലികളും പൈപ്പ് സ്ഥാപിക്കുന്ന ജോലികളും പുരോഗമിക്കുകയാണ്. മഴക്കാലം എത്തുന്നതിന് മുന്‍പ് തടയണ നിര്‍മാണം പരമാവധി നടത്തുകയാണ് അധികൃതരുടെ ലക്ഷ്യം.
പദ്ധതി നിര്‍മാണോദ്ഘാടനം 2017 ഡിസംബറില്‍ വൈദ്യുത മന്ത്രി എം.എം. മണി നിര്‍വഹിച്ച് പണികള്‍ ആരംഭിച്ചെങ്കിലും 2018 ഓഗസ്റ്റില്‍ പ്രളയം വന്നതോടെ പണികള്‍ മുടങ്ങി. എന്നാലിപ്പോള്‍ വീണ്ടും നിര്‍മാണം തുടങ്ങിയതോടെ പദ്ധതി വൈകാതെ നടപ്പിലാകുമെന്ന പ്രതീക്ഷയിലാണ് ജനങ്ങള്‍.
ജില്ലാപഞ്ചായത്ത് എട്ടരയേക്കറോളം ഭൂമിയാണ് പദ്ധതിക്കായി പാലക്കുഴിയില്‍ ഏറ്റെടുത്തിരിക്കുന്നത്. ജൂലൈ മുതല്‍ നവംബര്‍ വരെയാണ് ഇവിടെ വെള്ളം ഉള്ളതെന്നതിനാല്‍ കൂടുതല്‍ ജലം ശേഖരിക്കാന്‍ ചെക്ക് ഡാം 70 മീറ്റര്‍ നീളത്തിലും അഞ്ച് മീറ്റര്‍ ഉയരത്തിലും നിര്‍മിക്കുമെന്ന് ജില്ലാപഞ്ചായത്ത് പ്രസിഡന്റും, കമ്പനി ചെയര്‍പഴ്‌സനുമായ കെ.ശാന്തകുമാരി പറഞ്ഞു. ഇതിനായി ഡാം ഏരിയ വര്‍ധിപ്പിച്ച് വെള്ളം സംഭരിക്കാനാണ് ഉദ്ദേശിക്കുന്നത്.
