ഹരിപ്പാട്: മഴക്കാലം തൊട്ടടടുത്ത് എത്തിയതോടെ അപ്പര്‍കുട്ടനാട്ടില്‍ സാംക്രമിക രോഗസാധ്യതയേറി. മഴക്കാലപൂര്‍വ്വ ശുചീകരണ പ്രവര്‍ത്തനങ്ങള്‍ ഫലപ്രദമായി ഇവിടെ നടപ്പാക്കിയിട്ടില്ല. പേരിന് വേണ്ടി റോഡുവക്കിലെ പുല്ലുചെത്തല്‍ മാത്രമാണ് നടക്കുന്നത്.
റോഡുവക്കിലും നദീതീരങ്ങളിലും തള്ളുന്ന മാലിന്യങ്ങള്‍ മഴയാരംഭിച്ചതോടെ അഴുകി ദുര്‍ഗന്ധപൂരിതമാണ്.ഹരിപ്പാട് വീയപുരം റോഡിലെ കാരിച്ചാല്‍ ,പായിപ്പാട് ,വീയപുരം പാലത്തിന്റെ വശങ്ങളില്‍ കൊണ്ടു തള്ളുന്ന മാലിന്യങ്ങള്‍ റോഡിലേക്ക് ഒലിച്ചിറങ്ങി റോഡില്‍ വഴുവഴുപ്പ് സൃഷ്ടിക്കുന്നു.
ആരോഗ്യവകുപ്പിന്റെ സഹകരണം മിക്കമേഖലകളിലും കുറവാണെന്ന് എക്കാലത്തെയും ആരോപണമാണ്.
ചില പഞ്ചായത്തുകള്‍ മഴക്കാല ശുചീകരണമെന്ന പേരില്‍ മുന്‍ കാലത്തെ പോലെ ചില തട്ടിക്കൂട്ട് പ്രവര്‍ത്തനങ്ങള്‍ക്ക് തുടക്കം കുറിച്ചെങ്കിലും ഫലപ്രദ നടപടികള്‍ സ്വീകരിച്ചിട്ടില്ല. കുട്ടനാട്ടില്‍പ്പെടുന്ന പത്തനംതിട്ട ജില്ലയിലെ നിരണം, കടപ്ര, പെരിങ്ങര, നെടുമ്പ്രം പഞ്ചായത്തുകളിലും ആലപ്പുഴ ജില്ലയിലെ വീയപുരം,എടത്വ,തലവടി,ചെറുതന പഞ്ചായത്തുകളിലുംസാംക്രമിക രോഗസാധ്യത ഏറെയാണ്.വെള്ളം കെട്ടിക്കിടക്കുന്ന പാടശേഖരങ്ങളിലേയും ഇടത്തോടുകളിലേയും മാലിന്യങ്ങള്‍ മഴ പെയ്യുമ്പോള്‍ ഒലിച്ചിറങ്ങി രോഗങ്ങള്‍ പകരാനിടയുണ്ട്.പുളിക്കീഴ്, പരുമല പാലങ്ങളുടെ വശങ്ങളില്‍ തള്ളുന്ന മാലിന്യങ്ങള്‍ റോഡിലൂടെ ഒഴുകിയിറങ്ങി വഴുവഴുപ്പുണ്ടാക്കുന്നു. മാത്രമല്ല ജനവാസ പ്രദേശങ്ങളിലേക്ക് ഇത് ഒഴുകിയെത്തുന്നു.കഴിഞ്ഞ വര്‍ഷം മഴക്കാലത്ത് ഈ പ്രദേശങ്ങളില്‍ എലിപ്പനി വ്യാപകമായിരുന്നു. അപ്പര്‍കുട്ടനാടന്‍ മേഖലയിലെ കോളനികളുടെ അവസ്ഥയും സുരക്ഷിതമല്ല. പഴക്കമേറിയ പൊട്ടിയൊലിക്കുന്ന ശൗചാലയങ്ങള്‍ രോഗസാധ്യത ഉയര്‍ത്തുന്നു.പുളിക്കീഴ് ഷുഗര്‍ ഫാക്ടറിക്ക് സമീപം അടുത്ത കാലത്ത് ആരംഭിച്ച കോളനികളുടെ അവസ്ഥ ദയനീയമാണ്.മഴ പെയ്താല്‍ തന്നെ വെള്ളക്കെട്ടാണിവിടം.
കുടുംബശ്രീയുടെ സഹകരണത്തില്‍ വീടുകളില്‍ ബ്‌ളീച്ചിംഗ് പൗഡര്‍ വിതരണം മാത്രമാണ് മഴക്കാല പൂര്‍വ്വ ശുചീകരണമെന്ന പേരില്‍ നടക്കുന്നത്. അധികൃതരുടെ മേല്‍നോട്ടമില്ലായ്മ കാരണം ഇത് ഫലപ്രദമല്ല. ചെറുതന,വീയപുരം, നിരണം, പരുമല എന്നീ പ്രാഥമികാരോഗ്യ കേന്ദ്രങ്ങളും സജീവമാകേണ്ടതുണ്ട്. ഈ മേഖലയില്‍ പനി ബാധിതര്‍ ഏറെയുണ്ട്. വേണ്ടത്ര മരുന്നുകള്‍ ഇവിടെ ലഭ്യമല്ല. ജീവനക്കാരുടെ കുറവും ഉണ്ട്. മഴക്കാല സമയത്ത് ഈ ആശുപത്രികളുടെ സമയം ദീര്‍ഘിപ്പിക്കണം എന്ന ആവശ്യവുമുണ്ട്.
