മേളൂര്‍: കുട്ടികളെ തട്ടിക്കൊണ്ടു പോകുന്നവളെന്നാരോപിച്ച്‌ വഴിയാത്രക്കാരിയായ യുവതിയെ ജനക്കൂട്ടം മര്‍ദിച്ചു. തനിക്ക് കഴിക്കാന്‍ വാങ്ങിയ ബിസ്‌കറ്റ് യുവതി കയ്യില്‍ പിടിച്ചിരുന്നു. ഇതു കണ്ട് കുട്ടികളെ പ്രലോഭിപ്പിച്ച്‌ കൊണ്ടു പോകാനാണെന്ന് പറഞ്ഞാണ് മര്‍ദിച്ചത്. കയ്യും കാലും കെട്ടിയിട്ട ശേഷമാണ് ഒരു സംഘം ആളുകള്‍ ചേര്‍ന്ന് യുവതിയെ ക്രൂര മര്‍ദനത്തിനിരയാക്കിയത്. കുട്ടികളെ മിഠായികളും പലഹാരങ്ങളും നല്‍കി പ്രലോഭിപ്പിച്ച്‌ തട്ടിക്കൊണ്ടു പോകുന്നവര്‍ ഇറങ്ങിയിട്ടുണ്ടെന്ന് സോഷ്യല്‍ മീഡിയയിലൂടെ വ്യാജ സന്ദേശം പ്രചരിച്ചിരുന്നു.
ഇതോടെയാണ് ബിസ്‌കറ്റ് വാങ്ങിയെന്ന ഒറ്റക്കാരണത്താല്‍ യുവതി ഇരയാക്കപ്പെട്ടത്. രാജ്യത്ത് പല ഭാഗത്തും വ്യാജ വാര്‍ത്തയെത്തുടര്‍ന്ന് സമാനമായ ആക്രമണങ്ങള്‍ വര്‍ധിക്കുകയാണ്. നിരവധി യുവാക്കള്‍ മര്‍ദനത്തില്‍ കൊല്ലപ്പെടുകയും ചെയ്തിട്ടുണ്ട്. സംഭവമറിഞ്ഞെത്തിയ പോലീസ് യുവതിയെ മോചിപ്പിച്ചു. ഉടന്‍ തന്നെ ആശുപത്രിയില്‍ പ്രവേശിപ്പിച്ചു. ശരീരത്തില്‍ പലയിടത്തും മാരകമായ പരിക്കുകള്‍ പറ്റിയിട്ടുണ്ടെന്നും ഡോക്ടര്‍മാര്‍ അറിയിച്ചു. ആക്രമിച്ച കണ്ടാലറിയാവുന്നവരെ പ്രതി ചേര്‍ത്ത് പോലീസ് കേസെടുത്തു.
