തിരുവനന്തപുരം: നമ്മുടെ നാട്ടില്‍ കൗമാരക്കാരായ കുട്ടികള്‍ പല വിധത്തിലുള്ള ചൂഷണങ്ങള്‍ക്കും വിധേയരാകുന്നുണ്ടെന്ന് ജില്ലാ കളക്റ്റര്‍ ഡോ. വാസുകി ഐഎഎസ്. കുട്ടികള്‍ പൊതു സമൂഹത്തിലും സ്വന്തം വീടുകളില്‍ പോലും സുരക്ഷിതരല്ലെന്ന് അവര്‍ പറഞ്ഞു. കുട്ടികളുടെ സമഗ്രവികസനം ലക്ഷ്യമാക്കിയുള്ള നവീനവും നൂതനവുമായ അനവധി സാമൂഹ്യ പ്രവര്‍ത്തനങ്ങള്‍ക്ക് പൊതുസമൂഹത്തിന്റെ സഹായത്തോടെയും പിന്തുണയോടെയും നേതൃത്വം വഹിക്കാന്‍ സംസ്‌ഥാന ജില്ലാ ശിശുക്ഷേമ സമിതിയ്ക്ക് സാധിച്ചുവെന്ന് സമിതിയുടെ പ്രസിഡന്റ് കൂടിയായ വാസുകി പറഞ്ഞു.
കുട്ടികള്‍ മാനസിക പീഡനങ്ങള്‍ക്കും ലൈംഗിക പീഡനങ്ങള്‍ക്കും വിധേയരാകുന്നുണ്ടെന്നും, കഴിഞ്ഞ വര്‍ഷങ്ങളേക്കാള്‍ കൂടുതല്‍ ഇത്തരം കേസുകള്‍ ഈ വര്‍ഷങ്ങളില്‍ രേഖപ്പെടുത്തിയിട്ടുണ്ടെന്നും കളക്റ്റര്‍ വ്യക്തമാക്കി. ജില്ലാ ശിശുക്ഷേമ സമിതിയുടെ ജനറല്‍ ബോഡി മീറ്റിങ്ങ് ഉദ്ഘാടനം ചെയ്‌ത്‌ സംസാരിക്കുകയായിരുന്നു അവര്‍.
അതേസമയം ഇത്തരം അതിക്രമങ്ങള്‍ നിവാരണം ചെയ്യുന്ന ജില്ലാ ശിശുക്ഷേമ സമിതിയുടെ പ്രവര്‍ത്തനങ്ങള്‍ അഭിമാനാര്‍ഹമാണ്‌എന്നും കളക്റ്റര്‍ പ്രതികരിച്ചു. ഉദ്ഘാടനത്തില് ജില്ലാ ശിശുക്ഷേമ സമിതി സെക്രട്ടറി മടത്തറ സുഗതന്‍, ട്രഷറര്‍ ജി.എല്‍. അരുണ്‍ ഗോപി, വൈസ് പ്രസിഡന്റ് ഗാഥാ ജി.എസ്., ജോയിന്റ് സെക്രട്ടറി എല്‍.എസ്. പ്രസന്നന്‍, സംസ്‌ഥാന ശിശുക്ഷേമ സമിതി സെക്രട്ടറി എസ്.പി. ദീപക്, സംസ്‌ഥാന എക്സിക്യൂട്ടീവ് അംഗം ആര്‍. രാജു എന്നിവര്‍ പങ്കെടുത്തു.
