സന്നിധാനം: ദര്‍ശനം കഴിഞ്ഞാല്‍ വൈകുന്നേരം തിരിച്ചിറങ്ങാമെന്ന് പൊലീസിന് ഉറപ്പ് നല്‍കി ഹിന്ദു ഐക്യവേദി സംസ്ഥാന അദ്ധ്യക്ഷ കെ.പി.ശശികല സന്നിധാനത്തേക്ക് തിരിച്ചു. രാവിലെ എരുമേലിയില്‍ നിന്ന് കെ.എസ്.ആര്‍.ടി.സി ബസില്‍ പമ്ബയിലേക്ക് തിരിച്ച ശശികലയെയും കൂട്ടരെയും നിലയ്‌ക്കലില്‍ വച്ച്‌ എസ്.പി.യതീഷ്ചന്ദ്രയുടെ നേതൃത്വത്തിലുള്ള പൊലീസ് സംഘം തടഞ്ഞു.
സന്നിധാനത്തേക്ക് പോകാന്‍ തടസമില്ലെന്നും എന്നാല്‍ അവിടെ എത്തിയാല്‍ പ്രശ്‌നങ്ങള്‍ ഉണ്ടാക്കില്ലെന്ന് ഉറപ്പ് നല്‍കണമെന്നും പൊലീസ് സംഘം ആവശ്യപ്പെട്ടു. തുടര്‍ന്ന് ഇക്കാര്യം രേഖാമൂലം എഴുതി നല്‍കിയ ശേഷമാണ് ശശികലയെ പോകാന്‍ അനുവദിച്ചത്. ഇതിനിടയില്‍ പൊലീസുമായി വാക്കുതര്‍ക്കത്തിലേര്‍പ്പെട്ട രണ്ട് യുവാക്കളെ ഔദ്യോഗിക കൃത്യനിര്‍വഹണം തടസപ്പെടുത്താന്‍ ശ്രമിച്ചുവെന്ന് ആരോപിച്ച്‌ അറസ്‌റ്റ് ചെയ്‌ത് നീക്കി. പിന്നീട് ശശികലുടെ കൂടെ വന്നവരാണ് ഇവരെന്ന് മനസിലാക്കിയതോടെ വിട്ടയച്ചതായി പൊലീസ് അറിയിച്ചു.
