കോട്ടയം: കാത്തിരിപ്പ് കണ്ണീരിലാഴ്‌ത്തി കെവിന്‍ തിരിച്ച്‌ വരില്ലെന്ന് അറിഞ്ഞതോടെ ഇല്ലാതായത് ഒരു ജീവന്‍ മാത്രമല്ല. 'ഇനിയെന്ത് ചെയ്യും അപ്പച്ഛാ' എന്ന നീനുവിന്റെ ചോദ്യത്തിന് മുന്നില്‍ മറുപടി പറയാന്‍ പിലാത്തറ വീട്ടിലെ ആര്‍ക്കും സാധിക്കില്ല. അമലഗിരി ബി.കെ കോളേജിലെ രണ്ടാം വര്‍ഷ ജിയോളജി വിദ്യാ‌ര്‍ത്ഥിനിയായ നീനുവും കെവിനും തമ്മില്‍ രണ്ടു വര്‍ഷം മുന്‍പാണ് അടുപ്പത്തിലായത്.
ഈ പരിചയം പ്രണയത്തിലേയ്‌ക്ക് വളര്‍ന്നു. വീട്ടുകാര്‍ മറ്റൊരു വിവാഹം ആലോചിച്ചതിനാല്‍ 25ന് കോട്ടയം സബ് രജിസ്ട്രാര്‍ ഓഫീസില്‍ ഇരുവരും വിവാഹം രജിസ്റ്റര്‍ ചെയ്‌തിരുന്നു. അതേസമയം, കെവിന്റെ ഭാര്യയായി ആ വീട്ടില്‍ തന്നെ ജീവിതകാലം മുഴുവന്‍ ജീവിക്കുമെന്നും ഭര്‍ത്താവിനെ കൊന്ന സ്വന്തം വീട്ടിലേക്ക് ഇനി മടങ്ങിപ്പോവില്ലെന്നും നീനു വ്യക്തമാക്കി. എന്താണ് നടന്നതെന്ന് തനിക്കറിയില്ലെന്നും സ്വന്തം സഹോദരന്‍ കെവിനെ കൊല്ലാന്‍ ഇറങ്ങുമെന്ന് ഒരിക്കലും കരുതിയിരുന്നില്ലെന്നും പൊട്ടിക്കരഞ്ഞു കൊണ്ട് നീനു പറയുന്നു.
