തൊടുപുഴ: പ്രതിശ്രുതവരനെ വേണ്ടെന്നുവെച്ച യുവതി ഈരാറ്റുപേട്ട സ്വദേശിയായ കാമുകനൊപ്പം പോയി. ബുധനാഴ്ച തൊടുപുഴയില്‍ വിവാഹവസ്ത്രം എടുക്കാനെത്തിയ യുവതിയെ തുണിക്കടയില്‍നിന്നും കാമുകന്‍ വിളിച്ചിറക്കി കൊണ്ടുപോകാന്‍ ശ്രമിച്ചതാണ് പ്രശ്നങ്ങള്‍ക്ക് തുടക്കം. യുവതി പോകുന്നത് സഹോദരനും പ്രതിശ്രുതവരനും ബന്ധുക്കളുംചേര്‍ന്നു തടഞ്ഞതും സംഘര്‍ഷമുണ്ടാക്കിയിരുന്നു. സംഭവത്തില്‍ പ്രതിശ്രുതവരന്‍, കാമുകന്‍, യുവതിയുടെ സഹോദരന്‍ തുടങ്ങി ആറുപേര്‍ക്കെതിരേ പോലീസ് കേസെടുക്കുകയും ചെയ്തിരുന്നു.
ഉടുമ്പന്നൂര്‍ സ്വദേശിയായ യുവതിയുടെ ബന്ധുക്കളുമായും കാമുകന്റെ ബന്ധുക്കളുമായും പോലീസ് വ്യാഴാഴ്ച ചര്‍ച്ച നടത്തിയിരുന്നു. കാമുകന്റെ അടുത്ത ബന്ധുക്കള്‍ എത്തിയതിനെത്തുടര്‍ന്നാണ് യുവതിയുടെ ഇഷ്ടപ്രകാരം അയച്ചതെന്ന് തൊടുപുഴ പോലീസ് അറിയിച്ചു. പെണ്‍കുട്ടി കാമുകനൊപ്പം പോകുമെന്ന് അറിയിച്ചതിനാല്‍ യുവതിയെ പോലീസ് തൊടുപുഴ മൈലക്കൊമ്പിലെ ഷെല്‍ട്ടര്‍ഹോമില്‍ പാര്‍പ്പിച്ചിരിക്കുകയായിരുന്നു. ഇതോടെ, ഞായറാഴ്ച നടക്കാനിരുന്ന വിവാഹത്തില്‍നിന്നു പിന്മാറിയതായി പ്രതിശ്രുതവരനും ബന്ധുക്കളും അറിയിച്ചിരുന്നു.
