വടക്കാഞ്ചേരി: മൂന്ന് ദിവസം മാത്രം പ്രായമായ കുഞ്ഞിനെ പള്ളിയില്‍ ഉപേക്ഷിച്ച് മുങ്ങിയ സംഭവത്തില്‍ ബിറ്റോയുടെ മൊഴി പോലീസ് രേഖപ്പെടുത്തി. സുഹൃത്തുക്കളുടെ പരിഹാസം ഭയന്നാണ് നാലാമത്തെ കുട്ടിയെ ഉപേക്ഷിച്ചതെന്നാണ് ബിറ്റോ പോലീസിന് മൊഴി നല്‍കിയത്. തുണിക്കടകളില്‍ ജോലിചെയ്യുന്ന ബിറ്റോയ്ക്ക് സാമ്പത്തിക പ്രതിസന്ധിയുണ്ടായിരുന്നു. ഭാര്യ നാലാമതും ഗര്‍ഭിണിയായതോടെ സുഹൃത്തുക്കളോടും നാട്ടുകാരോടും ബിറ്റോ പറഞ്ഞിരുന്നത് ഭാര്യയ്ക്ക് ഗ്യാസിന്റെ അസുഖം ഉണ്ടെന്നായിരുന്നു.
ഭാര്യ പ്രബിത തൃശ്ശൂര്‍ മെഡിക്കല്‍ കോളേജില്‍ പ്രസവിച്ചു. സാമ്പത്തിക പ്രതിസന്ധിയും കളിയാക്കുമോ എന്ന ഭയവുംമൂലം കുഞ്ഞിനെ ഇടപ്പള്ളി പള്ളിയിലെത്തിക്കാന്‍ തീരുമാനിച്ചു. മറ്റു മൂന്ന് കുട്ടികളെയും ഇടപ്പള്ളി യാത്രയില്‍ ഒപ്പം കൂട്ടി. വീട്ടുകാരെ വിശ്വസിപ്പിക്കാനായിരുന്നു ഇത്. പള്ളിയില്‍ കുഞ്ഞിനെ കുമ്പസാരക്കൂടിനു സമീപം സമര്‍പ്പിച്ചു പോന്നത് കര്‍ത്താവിനെ കുഞ്ഞിനെ ഏല്‍പ്പിച്ചുവെന്ന വിശ്വാസത്തോടെയായിരുന്നുവെന്ന് ബിറ്റോ പറഞ്ഞു.
