ഏറെ ഔഷധഗുണങ്ങളുള്ളതാണ് ഇഞ്ചിയും ചുക്കും. ഇന്നും പലര്‍ക്കും ഇതിന്റെ മേന്മകള്‍ അറിയില്ല. വീട്ടില്‍ ഇഞ്ചിയുണ്ടെങ്കില്‍ ശാരീരികാസ്വസ്ഥതകളിലേറിയ പങ്കിനെയും അകറ്റിനിര്‍ത്താന്‍ കഴിയും. ഇഞ്ചിയുടെയും ചുക്കിന്റെയും ചില ഔഷധഗുണങ്ങളാണ് താഴെകൊടുത്തിരിക്കുന്നത്.
ഇഞ്ചി അരച്ച് അല്പം വെണ്ണയും ചേര്ത്തു കഴിച്ചാല്‍ ചുമ മാറും.
50 ഗ്രാം ചുക്ക്, 100 ഗ്രാം വറുത്ത എള്ള്, 300 ഗ്രാം ശര്‍ക്കര ഇവ കൂട്ടിയിടിച്ചു ഗുളികയായി കഴിച്ചാല്‍ ചുമ കുറയും.
തലവേദനയ്ക്കും കൊടിഞ്ഞിയ്ക്കും ചുക്ക് പൊടി ചെറു ചൂടുവെള്ളത്തില്‍ കുഴച്ചു കുഴമ്പു രൂപത്തില്‍ നെറ്റിയില്‍ പുരട്ടുന്നത് നല്ലതാണ്.
ഇഞ്ചി നീരും ചെറുതേനും സമം ചേര്ത്തു പതിവായി അര സ്പൂണ്‍ വീതം കുടിച്ചാല്‍ രക്തസമ്മര്‍ദ്ദം നിയന്ത്രണ വിധേയമാകും.
ഇഞ്ചി , തഴുതാമം, മുരിങ്ങയില , വെളുത്തുള്ളി ഇവയുടെ നീര് സമം എടുത്തു ചെറുതേനും ചേര്ത്തു പതിവായി കഴിയ്ക്കുന്നത് രക്തസമ്മര്‍ദ്ദം നിയന്ത്രിയ്ക്കും.
ഇഞ്ചി കൂര്‍പ്പിച്ചു ചുണ്ണാമ്പില്‍ മുക്കി അരിമ്പാറയുടെ പുറത്തു തുടച്ചാല്‍ അരിമ്പാറ മാറും.
ഇഞ്ചി ഇടിച്ചു പിഴിഞ്ഞ നീരും ചെറുനാരങ്ങയും സമം എടുത്തു ഇന്തുപ്പ് അല്പം ചേര്‍ത്ത് ദിവസവും മൂന്നുനാലു നേരം കഴിയ്ക്കുക. ദഹനക്കേട് , ഗ്യാസ്ട്രബിള്‍ തുടങ്ങിയ രോഗങ്ങള മാറുന്നതാണ്.
ഇഞ്ചി നീരില്‍ കുരുമുളകും ജീരകവും സമം ചേര്‍ത്ത് ഉപയോഗിയ്ക്കുന്നത് അരുചി , പുളിച്ചു തികട്ടല്‍ ഇവ അകറ്റാന്‍ നല്ലതാണ്.
ഇഞ്ചിയുടെയും കരിമ്പിന്റെയും നീര് സമം എടുത്തു മോരും ശര്‍ക്കരയും ചേര്‍ത്തുപയോഗിച്ചാല്‍ അരുചി മാറും.
ചുക്ക് കഷായത്തില്‍ ഞെരിഞ്ഞില്‍ പൊടിച്ചു ചേര്ത്തു ഉപയോഗിയ്ക്കുന്നത് മൂത്രസംബന്ധമായ രോഗങ്ങള്‍ അകറ്റും.
ഛര്‍ദ്ദി, വയറുവേദന ഇവ മാറാന്‍ ഇഞ്ചിനീരു തെളി മാറ്റി ഊറ്റി അല്പം ഉപ്പു ചേര്ത്തു കഴിയ്ക്കുക.
ചുക്കും പെരുങ്കായവും അരച്ച് അല്പാല്പം കഴിച്ചാല്‍ വായു സംബന്ധമായ വേദന മാറും.
ഇഞ്ചി ചെറു കഷണങ്ങള്‍ ആക്കി മൂന്നുമാസം തേനിലിട്ടു സൂക്ഷിച്ച ശേഷം ദിവസവും ഒരു ചെറിയ സ്പൂണ്‍ വീതം കഴിച്ചാല്‍ വിശപ്പുണ്ടാകും . കണ്ണിന്റെ ആരോഗ്യത്തിനും വായു, പിത്തം അകറ്റാനും ഉത്തമമാണ്.
ഇഞ്ചിനീരില്‍ പാലും നെയ്യും ചേര്‍ത്തുപയോഗിച്ചാല്‍ മലബന്ധം ഉണ്ടാകില്ല .
ഇഞ്ചിനീരും തുല്യം ചെറുനാരങ്ങാ നീരും അല്പം പഞ്ചസാര ചേര്ത്തു യോജിപ്പിച്ചു കഴിയ്ക്കുന്നത് ഗര്‍ഭിണികളുടെ ഛര്‍ദ്ദി മാറ്റാന്‍ നല്ലതാണ് .
ഇഞ്ചിനീര് ചെറുചൂടില്‍ രണ്ടോ മൂന്നോ തുള്ളി ചെവിയില്‍ ഒഴിച്ചാല്‍ ചെവിവേദന മാറും.
ഇഞ്ചി ചതച്ചു ഇന്തുപ്പ് ചേര്ത്തു ശീലയില്‍ പിഴിഞ്ഞെടുക്കുക . ഈ നീര് രണ്ടുമൂന്നു തുള്ളി ചെവിയില്‍ ഒഴിച്ചാല്‍ ചെവിക്കുത്തു മാറും.
