കെട്ടിടത്തിന്റെ മൂന്നാംനിലയിലെ ജനാലയ്ക്കപ്പുറം കുടുങ്ങിപ്പോയ മൂന്ന് വയസുകാരിക്ക് രക്ഷകരായി രണ്ട് യുവാക്കള്‍. ഒരാള്‍ കൊറിയര്‍ സ്ഥാപനത്തിലെ ജീവനക്കാരനും മറ്റൊരാള്‍ വ്യാപാരിയുമാണ്. കിഴക്കന്‍ ചൈനയിലെ ജിയാങ്‌സു പ്രാവിശ്യയിലാണ് സംഭവം. രണ്ടുമിനിട്ടിനുള്ളിലാണ് ഇവര്‍ കെട്ടിടത്തിനു മുകളിലെത്തി പെണ്‍കുട്ടിയെ രക്ഷപ്പെടുത്തിയത്.
കുട്ടിയെ ഉറക്കിക്കിടത്തിയ ശേഷം മാതാപിതാക്കള്‍ പുറത്തുപോകുകയും ഇതിനിടെ ഉണര്‍ന്ന കുട്ടി ജനാലയുടെ കൊളുത്ത് തുറന്ന് പുറത്തെത്തുകയുമായിരുന്നു. യുവാക്കള്‍ കെട്ടിടത്തിനു സമീപത്തു കൂടി പോകുമ്പോഴാണ് ജനലിന് പുറത്ത് കുട്ടി കുടുങ്ങിക്കിടക്കുന്നത് ഇവര്‍ കണ്ടത്. തുടര്‍ന്ന് കെട്ടിടത്തിന്റെ മുകളിലേക്ക് കയറി ഇര്‍ കുട്ടിയെ രക്ഷിക്കുകയായിരുന്നു.കുട്ടിയെ രക്ഷപ്പെടുത്തിയവര്‍ക്ക് അഭിനന്ദനങ്ങളുമായി നിരവധി പേരാണ് രംഗത്തെത്തിയിരിക്കുന്നത്.
