കൊച്ചി: കര്‍ദിനാള്‍ മാര്‍ ജോര്‍ജ് ആലഞ്ചേരിക്കെതിരെ വിമത വൈദികര്‍ പ്രത്യക്ഷ സമരം തുടങ്ങി. എറണാകുളം-അങ്കമാലി അതിരൂപത ആസ്ഥാനത്ത് വിമത വൈദികര്‍ അനിശ്ചിതകാല ഉപവാസവും പ്രാര്‍ത്ഥനയും തുടങ്ങി. ആലഞ്ചേരിയെ ചുമതലയില്‍ നിന്ന് മാറ്റണമെന്നാണ് വിമത വൈദികരുടെ പ്രതിഷേധത്തിലെ പ്രധാന ആവശ്യം. അതിരൂപതയ്ക്ക് സ്വതന്ത്ര ചുമതലയുള്ള ആര്‍ച്ച് ബിഷപ്പ് വേണമെന്നും വിമത വൈദികര്‍ ആവശ്യപ്പെട്ടു.
കര്‍ദ്ദിനാള്‍ ആലഞ്ചേരി 14 ക്രിമിനല്‍ കേസുകളില്‍ പ്രതിയാണെന്നാണ് വിമത വൈദികര്‍ ആരോപിക്കുന്നത്. സിനഡ് അധ്യക്ഷ സ്ഥാനത്ത് നിന്ന് ആലഞ്ചേരിയെ നീക്കണം. സ്ഥിരം സിനഡ് അംഗങ്ങള്‍ നേരിട്ട് എത്തി ചര്‍ച്ച നടത്തണമെന്നും വിമത വൈദികര്‍ ആവശ്യപ്പെടുന്നു.
കര്‍ദിനാളിനെ ഇന്നു രാവിലെ 11ന് അരമനയില്‍ എത്തി സന്ദര്‍ശിച്ച 200 ഓളം വരുന്ന വൈദികര്‍ തങ്ങളുടെ ആവശ്യങ്ങള്‍ മുന്നോട്ടുവച്ചു. എന്നാല്‍ രണ്ടു മണിവരെ നീണ്ട ചര്‍ച്ചയിലും പ്രശ്നങ്ങളില്‍ പരിഹാരം കാണാതെ വന്നതോടെ അതിരൂപത ആസ്ഥാനത്തുതന്നെ അനിശ്ചിതകാല ഉപവാസവും പ്രവര്‍ത്ഥനയും തുടങ്ങുകയായിരുന്നു.
തങ്ങള്‍ ഉന്നയിച്ച ചോദ്യങ്ങള്‍ക്ക് മറുപടി പറയാന്‍ കര്‍ദിനാള്‍ തയ്യാറായിട്ടില്ലെന്നും മുന്നോട്ടുവച്ച നിലപാടുകളില്‍ നിന്ന് കര്‍ദിനാള്‍ പിന്നോക്കം പോകുന്നതുമാണ് ഉപവാസ സമരത്തിലേക്ക് മാറാന്‍ കാരണമെന്ന് വൈദികര്‍ പറഞ്ഞു. ഉപവാസവും പ്രാര്‍ത്ഥനയും അതിരൂപത അങ്കണത്തിനുള്ളിലായിരിക്കും. ഒരു വൈദികന്റെ നേതൃത്വത്തിലായിരിക്കും ഉപവാസവും പ്രാര്‍ത്ഥനയും അദ്ദേഹത്തിന് പിന്തുണയുമായി കുറച്ച് വൈദികരും ഉണ്ടായിരിക്കും. ആവശ്യങ്ങള്‍ നേടിയെടുക്കുന്നതു വരെ അനിശ്ചിതകാല ഉപവാസ സമരം തുടരുമെന്നും വൈദിക സമിതി വക്താവ് ഫാ.ജോസ് വൈലിക്കോടത്ത് പറഞ്ഞു.
വൈദികരുമായി സ്ഥിരം സിനഡ് അംഗങ്ങള്‍ ഉടന്‍ ചര്‍ച്ച നടത്തുക, 14 ക്രിമിനല്‍ കേസുകളില്‍ പ്രതിയായിരിക്കുന്ന കര്‍ദിനാളിനെ അതിരൂപതയുടെ ചുമതലയില്‍ നിന്ന് മാറ്റുക, ഓഗസ്റ്റിലെ സിനഡ് കര്‍ദിനാള്‍ ആലഞ്ചേരിക്കു പകരം മാര്‍പാപ്പയുടെ പ്രതിനിധിയുടെ നേതൃത്വത്തില്‍ ചേരണം, അതിരൂപതയ്ക്ക് സ്വീകാര്യനായ ആളെ അഡ്മിനിസ്ട്രേറ്റീവ് ആര്‍ച്ച്ബിഷപ് ആയി നിയമിക്കണം, സസ്പെന്റു ചെയ്യപ്പെട്ട ബിഷപുമാരെ തിരിച്ചെടുക്കണം തുടങ്ങിയ ആവശ്യങ്ങളാണ് വൈദികര്‍ മുന്നോട്ടുവച്ചിരിക്കുന്നത്.
