നിലമ്പൂര്‍: അനധികൃതമായി കളിമണ്ണ് കടത്തുകയായിരുന്ന രണ്ട് ടോറസ് വാഹനങ്ങള്‍ റവന്യൂ അധികൃതര്‍ പിടികൂടി. ചുങ്കത്തറ വരക്കോട് ഞായറാഴ്ച പുലര്‍ച്ചെ നടത്തിയ പരിശോധനയിലാണ് വാഹനങ്ങള്‍ കസ്റ്റഡിയിലെടുത്തത്. രഹസ്യ വിവരത്തെ തുടര്‍ന്നായിരുന്നു പരിശോധന. നേരത്തെ കരുളായി വില്ലേജിലെ മൈലംപാറയില്‍ നിന്നും മണ്ണ് നീക്കം ചെയ്യാനുള്ള ജിയോളജി വകുപ്പിന്റെ പാസ് മാത്രമാണ് ഇവരുടെ പക്കലുണ്ടായിരുന്നതെന്ന് റവന്യൂ അധികൃതര്‍ പറഞ്ഞു. മൈലംപാറയില്‍ പുഴയോടു ചേര്‍ന്ന പ്രദേശത്ത് ഖനനം നടത്തുന്നത് നാട്ടുകാര്‍ തടഞ്ഞിരുന്നു. തുടര്‍ന്ന് റവന്യൂ അധികൃതരെത്തി മണ്ണെടുക്കല്‍ നിറുത്തി വയ്പ്പിക്കുകയും ചെയ്തു. ഈ പാസുപയോഗിച്ചാണ് ഇപ്പോള്‍ വാഹനങ്ങള്‍ ചുങ്കത്തറ ഭാഗത്തുനിന്നും മണ്ണ് കടത്തിയത്. പരിശോധനയില്‍ ഇത് ബോദ്ധ്യമായതോടെ വാഹനങ്ങള്‍ എടക്കര പൊലീസിന്റെ സഹായത്തോടെ കസ്റ്റഡിയിലെടുത്ത് വെളിയംതോട്ടെ റവന്യൂ വകുപ്പിന്റെ സ്ഥലത്തേക്ക് മാറ്റി.
ഇതു സംബന്ധിച്ച റിപ്പോര്‍ട്ട് ഉടന്‍ സബ് കളക്ടര്‍ക്ക് കൈമാറുമെന്നും തുടര്‍നടപടികളുണ്ടാവുമെന്നും അധികൃതര്‍ പറഞ്ഞു. നിലമ്പൂര്‍ ഡപ്യൂട്ടി തഹസില്‍ദാര്‍മാരായ ചന്ദ്രമോഹന്‍, വിജയകുമാര്‍, വില്ലേജ് ഓഫീസര്‍മാരായ സുനില്‍കുമാര്‍,രാജേഷ് എന്നിവരുടെ നേതൃത്വത്തിലാണ് പരിശോധനകള്‍ നടത്തി വാഹനങ്ങള്‍ പിടിച്ചെടുത്തത്.
