ന്യൂഡല്‍ഹി: ഡല്‍ഹിയിലെ ചെങ്കോട്ടയ്ക്കു സമീപത്തുനിന്നും ഐഎസ് ഭീകരരെന്നു സംശയിക്കുന്ന രണ്ടു പേരേ പോലീസ് അറസ്റ്റ് ചെയ്തു. ചെങ്കോട്ടയ്ക്കു സമീപമുള്ള ബസ് സ്റ്റോപ്പില്‍ നിന്ന് വ്യാഴാഴ്ച വൈകുന്നേരമാണ് ഇവരെ പിടികൂടിയത്. കാഷ്മീരിലെ ഷോപ്പിയാന്‍ ജില്ലക്കാരായ പര്‍വേസ്, ഷംഷാദ് എന്നിവരാണ് പിടിയിലായതെന്ന് ഡല്‍ഹി പോലീസ് അറിയിച്ചു. ഇവരില്‍ നിന്ന് അത്യന്താധുനിക ആയുധങ്ങളും പിസ്റ്റളുകളും കണ്ടെത്തിയിട്ടുണ്ട്.
കസ്റ്റഡിയിലുള്ള ഇരുവരെയും പോലീസ് കൂടുതല്‍ ചോദ്യം ചെയ്തു വരികയാണ്. കാഷ്മീരിലെ ഐഎസ് ഘടകത്തിലെ അംഗങ്ങളാണ് ഇവരെന്ന് സംശയിക്കുന്നതായി പോലീസ് പറഞ്ഞു. മറ്റൊരിടത്തേക്ക് പോകാനുള്ള യാത്രയ്ക്കിടെയാണ് ഇരുവരും ഡല്‍ഹിയില്‍ പിടിയിലാകുന്നതെന്നും ഡല്‍ഹിയില്‍ ഇരുവര്‍ക്കും പ്രത്യേക ദൗത്യങ്ങളൊന്നുമില്ലായിരുന്നെന്ന് ഉറപ്പിച്ചതായും പോലീസ് പറഞ്ഞു. എഞ്ചിനീയറിംഗ് വിദ്യാര്‍ഥികളായ പര്‍വേസ്, ജംഷദ് എന്നിവര്‍ ഐഎസ് ആശയങ്ങളില്‍ ആകൃഷ്ടരായാണ് ഭീകരസംഘടനയില്‍ ചേര്‍ന്നതെന്നാണ് പോലീസ് നിഗമനം.
