കൊച്ചി: ന്യൂസീലൻഡിലെ ക്രൈസ്റ്റ് ചർച്ച് ഭീകരാക്രമണത്തിൽ കൊല്ലപ്പെട്ട കൊടുങ്ങല്ലൂർ സ്വദേശിനി അൻസി അലി ബാവയുടെ മൃതദേഹം നാട്ടിലെത്തിച്ചു. തിങ്കളാഴ്ച പുലർച്ചെ നെടുമ്പാശേരി വിമാനത്താവളത്തിലെത്തിച്ച മൃതദേഹം പിന്നീട് തിരുവള്ളൂരിലുള്ള ഭർത്താവിന്‍റെ വീട്ടിലേക്ക് കൊണ്ട് പോയി.
കൊടുങ്ങല്ലൂരിലെ കമ്മ്യൂണിറ്റി ഹാളിൽ മൃതദേഹം പൊതു ദർശനത്തിനുവയ്ക്കും.
മാർച്ച് 15നാണ് ന്യൂസിലാൻഡ് ക്രൈസ്റ്റ് ചർച്ച് നഗരത്തിലെ അൽ നൂർ മസ്ജിദിൽ ജുമാ നിസ്‌കാരത്തിനിടയിലുണ്ടായ ഭീകരാക്രമണത്തിൽ അൻസി ഉൾപ്പെടെ അമ്പത് പേർ കൊല്ലപ്പെട്ടത്.
ക്രൈസ്റ്റ്ചർച്ച് വെടിവയ്പിൽ അഞ്ച് ഇന്ത്യക്കാരാണ് കൊല്ലപ്പെട്ടത്. ഒരു വർഷം മുമ്പാണ് അൻസിയ ഭർത്താവ് അബ്ദുൾ നാസറിനൊപ്പം ന്യൂസിലൻഡിലേക്ക് പോയത്. ന്യൂസിലൻഡ് അഗ്രികൾച്ചർ യൂണിവേഴ്സിറ്റി എംടെക് വിദ്യാർത്ഥിനിയായിരുന്നു അൻസി. വെടിവയ്പ്പ് നടന്ന ദിവസം ഇവർ ഒരുമിച്ചാണ് പള്ളിയിലെത്തുന്നത്.
സംഭവസമയത്ത് പള്ളിയ്‌ക്ക് പുറത്തായിരുന്ന നാസർ നിസാര പരിക്കുകളോടെയാണ് രക്ഷപ്പെട്ടത്.
