മാവേലിക്കര : അഫ്ഗാനിസ്ഥാനില്‍ താലിബാന്‍ ഭീകരര്‍ തട്ടിക്കൊണ്ടുപോയ ഏഴ് ഇന്ത്യന്‍ എഞ്ചിനീയര്‍മാരില്‍ മലയാളിയും ഉണ്ടെന്ന് സൂചന. മാവേലിക്കര തെക്കേക്കര കുറത്തികാട് സ്വദേശിയായ മുരളീധരനാണ് ഭീകരരുടെ പിടിയിലായെന്ന് വിവരം ലഭിച്ചിരിക്കുന്നത്. വൈദ്യുതി സബ്‌സ്റ്റേഷന്‍ പണിക്കായി മൂന്നു മാസം മുന്‍പാണ് കെഇസി ഇന്റര്‍നാഷണല്‍ കമ്പനിയിലെ എന്‍ജിനീയറായ മുരളീധരന്‍ അഫ്ഗാനിസ്ഥാനിലെത്തിയത്.
കേന്ദ്രമന്ത്രി സുഷമ സ്വരാജ് ഞായറാഴ്ച വൈകിട്ടു തന്നെ അഫ്ഗാന്‍ മന്ത്രി സലാഹുദ്ദീന്‍ റബ്ബാനിയുമായി ഫോണില്‍ ബന്ധപ്പെട്ട് എല്ലാ സഹായവും അഭ്യര്‍ഥിച്ചിരുന്നു. ദേശീയ സുരക്ഷാ ഉപദേഷ്ടാവ് അജിത് ഡോവലും അഫ്ഗാനിസ്ഥാനുമായി ബന്ധപ്പെട്ടു സഹായം അഭ്യര്‍ഥിച്ചിരുന്നു.
ഭീകരരുടെ പിടിയിലായ സംഘത്തെ മോചിപ്പിക്കാന്‍ ഗോത്രവര്‍ഗക്കാരുടെ സഹായത്തോടെ ശ്രമം നടക്കുകയാണ്. കേസിന്റെ സ്വഭാവം പരിഗണിച്ച്‌ കൃത്യമായ വിവരങ്ങള്‍ പുറത്തു വിടാനാകില്ലെന്ന നിലപാടിലാണ് വിദേശകാര്യ മന്ത്രാലയം. ആരൊക്കെ വഴിയാണ് തട്ടിക്കൊണ്ടുപോയവരെ മോചിപ്പിക്കാന്‍ ശ്രമിക്കുന്നത് എന്ന കാര്യം രഹസ്യമാണെന്നും വിദേശകാര്യ മന്ത്രാലയ വക്താവ് വ്യക്തമാക്കി.
