ഹൈദരാബാദ്: പൊലീസുകാരെ കാഴ്‌ച്ചക്കാരാക്കി ഹൈദരാബാദ് നഗരമദ്ധ്യത്തില്‍ അക്രമികള്‍ യുവാവിനെ വെട്ടിക്കൊന്നു. രാജേന്ദ്ര നഗര്‍ സ്വദേശിയായ രമേഷ് ഗൗഡാണ് കൊല്ലപ്പെട്ടത്. രണ്ട് അക്രമികള്‍ യുവാവിനെ പിന്തുടര്‍ന്ന് ആക്രമിക്കുന്നതും യുവാവ് വെട്ടേറ്റ് വീഴുന്നതും അടങ്ങിയ ദാരുണദൃശ്യങ്ങള്‍ ഇപ്പോള്‍ സോഷ്യല്‍ മീഡിയയില്‍ വൈറലാണ്.
വെട്ടേറ്റു വീണയാള്‍ രക്തം വാര്‍ന്ന് അനക്കമില്ലാതാവുന്നതോടെ അക്രമികള്‍ ആഹ്ലാദം പ്രകടിപ്പിച്ച് ആയുധം ഉയര്‍ത്തിക്കാട്ടി പിന്‍വാങ്ങുന്നതും വീഡിയോയില്‍ വ്യക്തമാണ്. സമീപത്ത് മൂന്ന് പൊലീസുകാര്‍ ഉണ്ടായിരുന്നുവെന്നും അക്രമികളെ തടയാന്‍ ഇവര്‍ ഒന്നും ചെയ്‌തില്ലെന്നും ദൃക്‌സാക്ഷികളെ ഉദ്ദരിച്ച്‌ ഒരു ദേശീയ മാദ്ധ്യമം റിപ്പോര്‍ട്ട് ചെയ്യുന്നു. അതേസമയം, കഴിഞ്ഞവര്‍ഷം നടന്ന കൊലപാതകത്തിന്റെ പ്രതികാരമായാണ് അക്രമം നടന്നതെന്നാണ് പോലീസ് റിപ്പോര്‍ട്ട്.
