നാസിക്: മഹാരാഷ്ട്രയിലെ നാസിക്കില്‍ മുത്തൂറ്റ് ഫിനാന്‍സിന്റെ ഓഫീസില്‍ കൊള്ളസംഘത്തിന്റെ വെടിയേറ്റ് മലയാളി യുവാവ് മരിച്ചു. സ്ഥാപനത്തിലെ ജീവനക്കാരനായ മാവേലിക്കര സ്വദേശി സാജു സാമുവലാണ് കൊല്ലപ്പെട്ടത്. ബൈക്കിലെത്തിയ സംഘമാണ് സ്ഥാപനത്തിനകത്ത് എത്തി വെടിയുതിര്‍ത്തത്. ആക്രമണത്തില്‍ രണ്ട് മലയാളികള്‍ക്കുള്‍പ്പടെ മൂന്ന് പേര്‍ക്ക് പരിക്കേറ്റിട്ടുണ്ട്.
ബൈക്കിലാണ് മൂന്നംഗസംഘം മുത്തൂറ്റ് ഫിനാന്‍സ് ഓഫീസിലെത്തിയത്. സ്ഥാപനത്തില്‍ ഓഡിറ്റിംഗ് നടപടികള്‍ പുരോഗമിക്കുകയായിരുന്നു അപ്പോള്‍. ഇതിനിടെ ഓഫീസിലേക്ക് അതിക്രമിച്ച് കയറി തോക്ക് ചൂണ്ടിയ അക്രമികള്‍ ജീവനക്കാരുടെ മൊബൈല്‍ ഫോണും സ്വര്‍ണാഭരണങ്ങളും ചോദിച്ചു വാങ്ങി. ഇതിനിടെയാണ് സാജു സാമുവലിന് വെടിയേറ്റത്. തലയ്ക്ക് പിറകിലാണ് സാജുവിന് വെടിയേറ്റത്. സാജു തല്‍ക്ഷണം മരിച്ചു.
നാട്ടില്‍ നിന്ന് ഓഡിറ്റിംഗിനെത്തിയതായിരുന്നു സാജു സാമുവല്‍. മുത്തൂറ്റ് ഫൈനാന്‍സിലെ സിസ്റ്റം അഡ്മിനിസ്‌ട്രേറ്ററായിരുന്നു.
മൂന്നംഗ അക്രമി സംഘം മുത്തൂറ്റ് ഓഫീസിലെത്തിയ സിസിടിവി ദൃശ്യങ്ങള്‍ പൊലീസ് കണ്ടെടുത്തിട്ടുണ്ട്. ചുവന്ന ടീ ഷര്‍ട്ട് ധരിച്ച ഒരു യുവാവ് ഓടിച്ച ബൈക്കിന് പിന്നില്‍ കറുത്ത ഷര്‍ട്ടിട്ട മറ്റൊരാള്‍ ഇരിക്കുന്നത് കാണാം. ചെക്ക് ഷര്‍ട്ടിട്ട മറ്റൊരാള്‍ ഇതിന് പിന്നില്‍ ഇരിക്കുന്നുണ്ടായിരുന്നു.
മൂന്നാമന്‍ മുഖം മറച്ചുകൊണ്ടാണ് മുത്തൂറ്റ് ഓഫീസിലേക്ക് കയറുന്നത്. സിസിടിവി ദൃശ്യങ്ങളിലാണ് അക്രമികളുടെ മുഖം വ്യക്തമായി പതിഞ്ഞിരിക്കുന്നത്.
നാസിക്കില്‍ കൊള്ളസംഘത്തിന്റെ വെടിയേറ്റ് മലയാളി യുവാവ് മരിച്ചു
Posted on Jun 14, 2019, 10:45 pm IST at 10:45 pm 
