ഡല്‍ഹി: ഫരീദാബാദിലെ സ്വകാര്യ സ്‌കൂളിലുണ്ടായ തീപിടുത്തത്തില്‍ രണ്ട് കുട്ടികളുള്‍പ്പെടെ മൂന്ന് പേര്‍ കൊല്ലപ്പെട്ടു. ഫരീദാബാദിലെ ദബുവാ കോളനിയിലെ കെട്ടിടത്തിലാണ് തീപിടുത്തമുണ്ടായത്. കെട്ടിടത്തിന്റെ മുകളിലെ നിലയില്‍ പ്രവര്‍ത്തിക്കുകയായിരുന്ന എഎന്‍ഡി കോണ്‍വെന്റ് സ്‌കൂളിലെ രണ്ട് കുട്ടികളും അധ്യാപികയുമാണ് കൊല്ലപ്പെട്ടത്. മുകളില്‍ നിന്ന് പടര്‍ന്ന തീ താഴത്തെ നിലയില്‍ പ്രവര്‍ത്തിച്ചിരുന്ന തുണി സംഭരണശാലയിലേക്കും വ്യാപിച്ചു.
അവധിക്കാലമായതിനാല്‍ കോണ്‍വെന്റില്‍ കുട്ടികള്‍ കുറവായിരുന്നത് വന്‍ അപകടമൊഴിവാക്കി. അഗ്‌നിശമനസേനയെത്തി തീ പൂര്‍ണമായും നിയന്ത്രണവിധേയമാക്കി. തീപിടുത്തത്തിന്റെ കാരണം വ്യക്തമല്ല. കഴിഞ്ഞ മാസം മഹാരാഷ്ട്രയിലെ സൂററ്റില്‍ കോച്ചിങ് സെന്ററിലുണ്ടായ തീപിടുത്തത്തില്‍ വിദ്യാര്‍ത്ഥികളുള്‍പ്പെടെ 20 പേര്‍ കൊല്ലപ്പെട്ടിരുന്നു. സൂറത്തിലേതിന് സമാനമായി അഗ്‌നിശമനസേന സ്ഥലത്തെത്താന്‍ വൈകിയത് അപകടത്തിന്റെ വ്യാപ്തി കൂട്ടിയെന്ന് പരിസരവാസികള്‍ പറഞ്ഞു.
