ന്യൂഡല്‍ഹി: വിദേശകാര്യ മന്ത്രി സുഷമ സ്വരാജ് സഞ്ചരിച്ച വിമാനത്തിന്റെ ബന്ധം മൊറീഷ്യസിന്റെ വ്യോമപരിധിയില്‍വെച്ച്‌ 14 മിനിറ്റ് നേരത്തേക്ക് വിഛേദിക്കപ്പെട്ടതായി റിപ്പോര്‍ട്ട്.4.44ന് ഇന്ത്യന്‍ വ്യോമ പരിധിക്കകത്തുനിന്ന് മാലിയിലേക്ക് വ്യോമപാത മാറിയ ഉടനെയായിരുന്നു ഇത്. ഇവിടം 14 മിനിറ്റ് നേരത്തേക്ക് മൊറീഷ്യസ് എയര്‍ ട്രാഫിക് കണ്‍ട്രോളില്‍ വിമാനത്തെക്കുറിച്ച്‌ ഒരുവിവരവും ലഭ്യമായില്ല.
പിന്നീട് 4.58ന് സിഗ്നലുകള്‍ ലഭിച്ചുതുടങ്ങിയതോടെ മൊറീഷ്യസില്‍ സുരക്ഷിതമായി ഇറങ്ങി. തിരുവനന്തപുരത്തുനിന്ന് ശനിയാഴ്ച ഉച്ചക്ക് 2.08ന് ദ്വീപ് രാജ്യമായ മൊറീഷ്യസിലേക്ക് പുറപ്പെട്ട ഇന്ത്യന്‍ വ്യോമസേനയുടെ ഐ.എഫ്.സി 31 വിമാനത്തെ എയര്‍ ട്രാഫിക് കണ്‍ട്രോളിന് പിന്തുടരാന്‍ പറ്റിയില്ലെന്ന് എയര്‍പോര്‍ട്ട് അതോറിറ്റി ഓഫ് ഇന്ത്യയാണ് പുറത്തുവിട്ടത്.
