പാട്‌ന: സ്‌കൂള്‍ പ്രിന്‍സിപ്പലടക്കം 18 പേര്‍ തന്നെ പീഡിപ്പിച്ചെന്ന ഞെട്ടിക്കുന്ന വെളിപ്പെടുത്തലുമായി 14കാരി. ബിഹാറിലെ സരണ്‍ ജില്ലയിലാണ് നാടിനെ നടുക്കിയ സംഭവം ഉണ്ടായത്. കഴിഞ്ഞ എട്ട് മാസമായി പ്രിന്‍സിപ്പലും രണ്ട് അദ്ധ്യാപകരമുള്‍പ്പെട്ട സംഘം തന്നെ പീഡിപ്പിക്കുകയാണെന്നും ഇതില്‍ സഹപാഠികളും ഉള്‍പ്പെട്ടിട്ടുണ്ടെന്ന് പെണ്‍കുട്ടി പൊലീസില്‍ പരാതി നല്‍കിയത്. സംഭവം പുറത്തു പറയാതിരിക്കാന്‍ പീഡന ദൃശ്യങ്ങള്‍ പ്രതികള്‍ പകര്‍ത്തിയിരുന്നു. ഇതുപയോഗിച്ചായിരുന്നു പിന്നീടും പീഡിപ്പിച്ചത്. പരാതി പറയാനായി സമീപിച്ചപ്പോഴായിരുന്നു വിദ്യാര്‍ത്ഥിനിയെ പ്രിന്‍സിപ്പല്‍ ചൂഷണം ചെയ്‌തത്.
അന്വേഷണത്തില്‍ 2017 ഡിസംബറിലാണ് പെണ്‍കുട്ടി ആദ്യമായി പീഡനത്തിനിരയായതെന്ന് തെളിഞ്ഞു. കുട്ടിയുടെ പരാതിയുടെ അടിസ്ഥാനത്തില്‍ സ്‌കൂള്‍ പ്രിന്‍സിപ്പല്‍ ഉദയ്‌ കുമാര്‍ എന്ന മുകുന്ദ് സിംഗ്, അദ്ധ്യാപകനായ ബാലാജി, രണ്ട് വിദ്യാര്‍ത്ഥികള്‍ എന്നിവരെ പൊലീസ് അറസ്‌റ്റ് ചെയ്തു. അടുത്തിടെയായി ബിഹാറില്‍ സ്‌ത്രീകള്‍ക്ക് നേരെയുള്ള അതിക്രമം വര്‍ദ്ധിച്ചു വരികയാണ്. സര്‍ക്കാര്‍ രേഖകള്‍ പ്രകാരം ഈ വര്‍ഷം ആദ്യ മൂന്നുമാസത്തിനുള്ളില്‍ മാത്രം 127 മാനഭംഗ കേസുകളാണ് റിപ്പോര്‍ട്ട് ചെയ്‌തത്.
