കൊച്ചി: എ.ഐ.സി.സി ജനറല്‍ സെക്രട്ടറി ഉമ്മന്‍ചാണ്ടിയ്ക്കും പ്രതിപക്ഷ നേതാവ് രമേശ് ചെന്നിത്തലയ്ക്കും നേരെയുള്ള പ്രതിഷേധം അയവില്ലാതെ തുടരുന്നു. രാജ്യസഭാ സീറ്റ് നല്‍കി കേരളാ കോണ്‍ഗ്രസിനെ യു.ഡി.എഫിലേക്ക് തിരിച്ചെത്തിച്ചതിന് പിന്നാലെയാണ് പ്രതിഷേധം തുടരുന്നത്. എറണാകുളം ഡി.സി.സി ഓഫീസിനു മുന്നില്‍ ഇരുവരുടേയും ചിത്രം ശവപ്പെട്ടിയിലാക്കി റീത്ത് വച്ചും പോസ്റ്ററുകള് പതിച്ചുമാണ് അണികളുടെ പ്രതിഷേധം.
കോണ്ഗ്രസ് പ്രവര്‍ത്തകരുടെ മനസില്‍ ഉമ്മന്‍ചാണ്ടിയും രമേശും മരിച്ചു. പ്രസ്ഥാനത്തെ വിറ്റ നിങ്ങള്‍ക്ക് എന്ത് കിട്ടി. കോണ്‍ഗ്രസിലെ യൂദാസുമാരാണ് ഉമ്മന്‍ചാണ്ടിയും ചെന്നിത്തലയും എന്നെഴുതിയ പോസ്റ്ററുകളും കാണാം. സേവ് കോണ്ഗ്രസ് എന്ന പേരിലാണ് പോസ്റ്ററുകള് പതിച്ചിരിക്കുന്നത്. കോണ്ഗ്രസ് പാര്‍ട്ടിയുടെ അഭിമാനത്തെക്കാള്‍ നിങ്ങള്‍ വില നല്‍കിയത് മാണിയുടെ വീട്ടിലെ കമ്മട്ടത്തിനോ, പ്രവര്‍ത്തകര്‍ രക്തസാക്ഷികള്‍ എന്നെഴുതിയ പോസ്റ്ററുകളും കാണാം. വെള്ളിയാഴ്ച രാത്രിയാണ് ശവപ്പെട്ടിയും ബോര്‍ഡുകളും കൊണ്ടുവച്ചതെന്ന് കരുതുന്നു.
