കൊച്ചി: യുഡിഎഫും എല്‍ഡിഎഫും ഈയാഴ്ച പകുതിയോടെ സ്ഥാനാര്‍ത്ഥി പട്ടിക പുറത്തിറക്കുമ്പോള്‍ സംസ്ഥാനത്തെ ബിജെപി സ്ഥാനാര്ഥി പട്ടിക അടുത്തയാഴ്ചത്തേക്കേ പ്രഖ്യാപനമുണ്ടാകൂ. തെരഞ്ഞെടുപ്പ് പ്രഖ്യാപനം മാര്‍ച്ച് ഏഴിനെന്ന പ്രധാനമന്ത്രിയുടെ വാക്ക് വിശ്വസിച്ചതാണ് ബിജെപി സ്ഥാനാര്‍ത്ഥി പട്ടിക വൈകാന്‍ കാരണം. കരട് പട്ടിക പത്തിന് മുമ്പ് കേന്ദ്രപാര്‍ലമെന്ററി ബോര്‍ഡിന് കൈമാറുമെന്ന് ബിജെപി അധ്യക്ഷന്‍ കെ സുരേന്ദ്രന്‍ അറിയിച്ചു. സുരേന്ദ്രന്റെ വിജയയാത്രയ്ക്ക് ശേഷം സ്ഥാനാര്‍ഥിപട്ടിക എന്നായിരുന്നു ബിജെപി തീരുമാനം.
ബിജെപി മണ്ഡലം, ജില്ലാ തല സാധ്യതാ പട്ടിക അടുത്ത വ്യാഴാഴ്ചക്കകം നല്‍കാനാണ് സംസ്ഥാന നേതൃത്വത്തിന്റെ നിര്‍ദേശം. വിജയ സാധ്യതയുണ്ടെന്ന് ബിജെപി കരുതുന്ന പതിനഞ്ച് എ പ്ലസ് മണ്ഡലങ്ങളുടെയെങ്കിലും കാര്യത്തില്‍ കൂടുതല്‍ ധാരണയുണ്ടാക്കാന്‍ കഴിയുമോയെന്നും പരിശോധിക്കുന്നുണ്ട്. ഇതിനിടെ ഘടകകക്ഷികളുമായുളള ചര്‍ച്ചയും പൂര്‍ത്തിയാക്കണം.
കഴിഞ്ഞ തവണ ബിഡിജെഎസ് മല്‍സരിച്ച ഏതാനും മണ്ഡലങ്ങള്‍ കൂടി ഇത്തവണ ബിജെപി ഏറ്റെടുക്കും. 2016ല്‍ ബിജെപി 98 മണ്ഡലങ്ങളിലും ബിഡിജെഎസ് 36 മണ്ഡലങ്ങളിലുമാണ് മല്‍സരിച്ചത്. ഇതിനിടെ രണ്ട് തവണ പൊട്ടിപ്പിളര്‍ന്ന ബിഡിജെഎസിനെ പണ്ടത്തേതു പോലെ കാര്യമായി പരിഗണിക്കേണ്ടെന്നാണ് ധാരണ. അവരില്‍ നിന്ന് ഏറ്റെടുക്കുന്ന ഏതാനും സീറ്റുകളില്‍കൂടി ബിജെപി മല്‍സരിക്കും. ഒപ്പം മറ്റു ഘടകക്ഷികളുമായിക്കൂടി ധാരണയുണ്ടാക്കണം. പി സി ജോര്‍ജിന്റെ പാര്‍ട്ടി എത്തുന്നത് കൂടി കണക്കാക്കിയാവും എന്‍ഡിഎയിലെ സീറ്റ് വീതം വയ്പ്പ്.
