കോഴിക്കോട്: സിനിമാ നടനും സംവിധായകനുമായ രഞ്ജിത്ത് നിയമസഭാ തെരഞ്ഞെടുപ്പില്‍ മത്സരിച്ചേക്കില്ല. തീരുമാനം പാര്‍ട്ടി നേതൃത്വത്തെ രഞ്ജിത്ത് അറിയിച്ചതായിട്ടാണ് വിവരം. ഇവിടെ സിറ്റിംഗ് എംഎല്‍എ യായ പ്രദീപ് കുമാര്‍ തന്നെ മത്സരിച്ചേക്കും. കോഴിക്കോട് സംസ്ഥാന സമിതിയംഗങ്ങള്‍ ഉള്‍പ്പെടെയുള്ളവര്‍ പങ്കെടുക്കുന്ന ജില്ലാ സെക്രട്ടറിയേറ്റില്‍ ഇക്കാര്യത്തില്‍ അന്തിമ തീരുമാനം ഉണ്ടാകും.
കോഴിക്കോട് നോര്‍ത്ത് മണ്ഡലത്തില്‍ നിന്നും രഞ്ജിത്ത് മത്സരിക്കുന്നതായി കഴിഞ്ഞ ദിവസമാണ് വാര്‍ത്ത പുറത്തു വന്നത്. പാര്‍ട്ടി നേതൃത്വം തന്നെ സമീപിച്ചിരുന്നതായും പാര്‍ട്ടി ആവശ്യപ്പെട്ടാല്‍ മത്സരിക്കുമെന്നും രഞ്ജിത്ത് തന്നെ വ്യക്തമാക്കുകയായിരുന്നു. എന്നാല്‍ 24 മണിക്കൂറിനുള്ളില്‍ തീരുമാനം മാറിമറിഞ്ഞത് അദ്ദേഹത്തിന്റെ സ്ഥാനാര്‍ത്ഥിത്വത്തോട് പല രീതിയിലുള്ള എതിര്‍പ്പ് വന്നത് മൂലമാണെന്ന് സ്ഥിരീകരിക്കാത്ത റിപ്പോര്‍ട്ടുണ്ട്.
ജില്ലാ സെക്രട്ടറിയേറ്റില്‍ ഭൂരിപക്ഷം പേരും പ്രദീപ്കുമാറിന് ഒരു അവസരം കൂടി നല്‍കാനും രഞ്ജിത്ത് മത്സരിക്കേണ്ടെന്ന നിലപാട് എടുത്തതായിട്ടാണ് സൂചനകള്‍. രഞ്ജിത്ത് സ്ഥാനാര്‍ത്ഥിത്വത്തെക്കുറിച്ച് അനുകൂലമായി പ്രതികരിച്ചതിന് തൊട്ടുപിന്നാലെ രഞ്ജിത്തിനെ വിമര്‍ശിച്ച് സാമൂഹ്യ മാധ്യമങ്ങളില്‍ പ്രതികരണങ്ങള്‍ വന്നിരുന്നു. ഇതിന് പിന്നാലെ പാര്‍ട്ടിക്കുള്ളില്‍ നിന്നു കൂടി എതിര്‍പ്പ് ഉയര്‍ന്ന സാഹചര്യത്തിലാണ് താന്‍ തന്നെ പിന്മാറുകയാണെന്ന് രഞ്ജിത്ത് പാര്‍ട്ടി നേതാക്കളെ അറിയിച്ചതെന്നാണ് വിവരം. തന്നേക്കാള്‍ കൂടുതല്‍ വിജയസാധ്യത പ്രദീപ്കുമാറിനാണെന്നും രഞ്ജിത്ത് അറിയിച്ചിട്ടുണ്ട്.
ഇ?തോടെ നാലാം തവണയും പ്രദീപ്കുമാര്‍ മത്സരിച്ചേക്കാനാണ് സാധ്യതകള്‍ തെളിയുന്നത്. കഴിഞ്ഞ തവണ 27,000 വോട്ടുകള്‍ക്ക് പിഎം സുരേഷ്ബാബുവിനെയാണ് പ്രദീപ്കുമാര്‍ തോല്‍പ്പിച്ചത്.
