ചെന്നൈ: ലോക്സഭ-നിയമസഭ തെരഞ്ഞെടുപ്പുകള്‍ക്ക് മുന്നോടിയായി തമിഴ്നാട്ടില്‍ രജനീകാന്തും കമല്‍ഹാസനും പ്രവര്‍ത്തനം സജീവമാക്കുന്നു. ഇതിന്റെ ഭാഗമായി ഇരുവരും തിരക്കിട്ട കൂടിയാലോചനകള്‍ തുടരുകയാണ്. 2021ലെ നിയമസഭ തെരഞ്ഞെടുപ്പില്‍ മത്സരിക്കുമെന്നാണ് രജനി നേരത്തെ പറഞ്ഞത്.
2019ലെ ലോക്സഭ തെരഞ്ഞെടുപ്പില്‍ മത്സരിക്കുന്ന കാര്യം പിന്നീട് തീരുമാനിക്കുമെന്നായിരുന്നു അന്നത്തെ മറുപടി. അതേസമയം 'മക്കള്‍ നീതി മയ്യ'വുമായി കമല്‍ഹാസന്‍ സംസ്ഥാന പര്യടനം തുടങ്ങി. തദ്ദേശ തെരഞ്ഞെടുപ്പില്‍ മത്സരിക്കുമെന്ന് പ്രഖ്യാപിച്ച കമല്‍ഹാസന്‍ ഗ്രാമങ്ങളിലാണ് ശ്രദ്ധ കേന്ദ്രീകരിക്കുന്നത്.
'വിസില്‍ ആപ്' എന്ന ഓണ്‍ലൈന്‍ സംവിധാനത്തിലൂടെ വിവിധയിടങ്ങളിലെ പ്രശ്നങ്ങളും പരാതികളും ക്ഷണിച്ചിരുന്നു. രണ്ടു മാസത്തിനകം കോയമ്പത്തൂരില്‍ പൊതുസമ്മേളനം നടത്തി പാര്‍ട്ടി ഔദ്യോഗികമായി പ്രഖ്യാപിക്കാനാണ് രജനീകാന്തിന്റെ നീക്കം. പാര്‍ട്ടി പ്രഖ്യാപനത്തിനു മുമ്ബ് കഴിയുന്നത്ര അംഗങ്ങളെ ചേര്‍ക്കും. ഓരോ ജില്ലകളിലെയും വികസനവിഷയങ്ങള്‍ ഏറ്റെടുക്കും.
