മലയാള സീരിയല്‍ പ്രേക്ഷകര്‍ക്ക് ഏറെ സുപരിചിതരായ താരദമ്പതികള്‍ മനോജും ബീന ആന്റണിയും ചെറിയൊരു ഇടവേളയ്ക്ക് ശേഷം വീണ്ടും ഒരുമിച്ചെത്തുകയാണ്. മഴവില്‍ മനോരമയില്‍ സംപ്രേഷണം ചെയ്ത ആത്മസഖിയില്‍ ഇരുവരും ഭാര്യഭര്‍ത്താക്കന്‍മാരായാണ് എത്തിയത്. പരമ്പരകള്‍ക്ക് പുറമേ മറ്റ് പരിപാടികളിലും ഇരുവരും ഒരുമിച്ചെത്താറുണ്ട്.
ഹാസ്യപശ്ചാത്തലത്തിലൊരുക്കുന്ന കുടുംബ കോടതിയുമായാണ് ഇരുവരും എത്തുന്നത്. അളിയന്‍ വേഴ്സസ് അളിയനിലൂടെ ശ്രദ്ധേയനായ രാജേഷ് തലച്ചിറയാണ് പരമ്പര സംവിധാനം ചെയ്യുന്നത്. കൈരളി ചാനലിലാണ് പരമ്പര സംപ്രേഷണം ചെയ്യുന്നത്. കുടുംബ പശ്ചാലത്തിലൊരുക്കുന്ന പരമ്പരയില്‍ ഭാര്യഭര്‍ത്താക്കന്‍മാരായിത്തന്നെയാണ് ഇരുവരും എത്തുന്നത്. അഡ്വക്കേറ്റ് ശശീന്ദ്രനായാണ് മനോജ് എത്തുന്നത്. അദ്ദേഹത്തിന്റെ ഭാര്യയായ ജമന്തിയുടെ റോളിലാണ് ബീന ആന്റണി.
നിരവധി പരമ്പരകളിലും സിനിമയിലൂടെയുമൊക്കെയായി പ്രേക്ഷകര്‍ക്ക് സുപരിചിതനായ ജീവന്‍ വേണുഗോപാലാണ് ബീന ആന്റണിയുടേയും മനോജിന്റേയും മകനായി എത്തുന്നത്. മെയ് 20 മുതല്‍ പരമ്പര സംപ്രേഷണം ചെയ്ത തുടങ്ങും.
