ആരാധകനെ കഴുത്തറുക്കുമെന്ന് തുര്‍ക്കി ക്യാപ്റ്റന്റെ ഭീഷണി. മത്സരം നടക്കുന്നതിനിടെ ഗ്യാലറിയില്‍ ഉണ്ടായിരുന്ന തന്റെ പിതാവിനെ ആരാധകര്‍ അക്രമിച്ചു എന്ന് തെറ്റിദ്ധരിച്ച്‌ ചെങ്ക് ടൗസണ്‍ രോഷാകുലനായതാണ് ചുവപ്പ് കാര്‍ഡില്‍ ചെന്നവസാനിച്ചത്. ഗ്യാലറിയില്‍ ടൗസന്റെ പിതാവിനടുത്ത് ഉണ്ടായിരുന്ന ആരാധകന്‍ ഗ്രൗണ്ടിലേക്ക് തീപന്തം വലിച്ചെറിയാന്‍ ശ്രമിച്ചത് ക്യാപ്റ്റന്റെ പിതാവ് തടയുകയായിരുന്നു.
എന്നാല്‍ അത് ആരാധകന്‍ തന്റെ പിതാവിനെ അക്രമിച്ചതാണെന്ന് ടൗസണ്‍ തെറ്റിദ്ധരിച്ചു. തുടര്‍ന്ന് ഗ്യാലറിയിലേക്ക് കയറാന്‍ ശ്രമിക്കുകയും ആരാധകനെ കഴുത്തറുക്കുമെന്ന് ആംഗ്യം കാണിക്കുകയും ചെയ്ത ക്യാപ്റ്റനെ റഫറി ചുവപ്പ് കാര്‍ഡ് കാട്ടി പുറത്താക്കുകയായിരുന്നു. പൊതുവെ ശാന്തനായ ടൗസണെ ഇന്നലെ ഇരുടീമിലെയും കളിക്കാര്‍ പിടിച്ച്‌ വെച്ചിട്ടും രോഷം അടങ്ങിയില്ല. എന്തായാലും വിലക്ക് ഈ ചുവപ്പ് കാര്‍ഡില്‍ അവസാനിച്ചേക്കില്ല. തുര്‍ക്കി ഫുട്ബോള്‍ അസോസിയേഷനും ടൗസണെതിരെ ശിക്ഷാ നടപടി പ്രഖ്യാപിച്ചേക്കാം.
