അവനൊന്നും കഴിക്കില്ല, പല അമ്മമാരുടെയും പതിവു പരാതിയാണിത്. രാവിലെ മുതല്‍ അവര്‍ മക്കളുടെ പിന്നാലെ കഴിക്കെന്റെ മോനേ എന്നു പറഞ്ഞു നടക്കുകയാണ്. പക്ഷേ മക്കള്‍ അതുകേട്ടമട്ടേ കാണിക്കില്ല. പിന്നെ വരുന്നവരോടും പോകുന്നവരോടുമെല്ലാം അമ്മമാര്‍ പരിദേവനം പറഞ്ഞു തുടങ്ങും. മക്കള്‍ കഴിക്കില്ലെന്നു പറയുന്നത് ഒരു സ്റ്റാറ്റസ് സിംബലായി കാണുന്നവരുമുണ്ട്. ഒന്നും കഴിക്കാതിരുന്നാല്‍ എങ്ങനെ പോഷകഗുണം ലഭിക്കും എന്നതും അമ്മമാരെ അലട്ടാറുണ്ട്. ഇത് നിസാരമായി കരുതിയാല്‍ ഭാവിയില്‍ കുട്ടികളുടെ ആരോഗ്യത്തെ തന്നെ ഇത് ബാധിച്ചേക്കാം.
കുട്ടിയുടെ വളര്‍ച്ച സാധാരണപോലെയാണെങ്കില്‍ കുറച്ചുനാള്‍ വിശപ്പു കുറയുന്നത് അത്ര കാര്യമാക്കേണ്ടതില്ല. അതേസമയം കുട്ടികള്‍ക്കു വേണ്ടത്ര ആരോഗ്യം ഇല്ലെങ്കില്‍ പോഷക ആഹാരങ്ങളോ മറ്റോ ഡോക്ടര്‍മാര്‍ നിര്‍ദേശിക്കും. കുട്ടികളെ പേടിപ്പിച്ച് ആഹാരം കഴിപ്പിക്കുന്നതാണ് ഒരുപരിധി വരെ കുഞ്ഞുങ്ങളുടെ ആഹാരത്തിനോടുള്ള വിരക്തിക്ക് കാരണം. അതിന് അമ്മമാര്‍ ചെയ്യേണ്ട എളുപ്പമാര്‍ഗം കഥ പറഞ്ഞോ മറ്റെന്തെങ്കിലും സൂത്രമൊപ്പിച്ചോ കുട്ടികള്‍ക്ക് ആഹാരം നല്‍കുക എന്നതാണ്. മുലപ്പാലിന്റെ അളവ് ശരിയായി ലഭിച്ചാല്‍ ആ കുട്ടി പൂര്‍ണ ആരോഗ്യവാനായിരിക്കും. മുലപ്പാലിന്റെ അളവ് കുറവാണോ എന്നതും ശ്രദ്ധിക്കേണ്ട കാര്യമാണ്.
ഒരാഴ്ചയില്‍ കൂടുതല്‍ നീളുന്ന വിശപ്പില്ലായ്മയ്ക്കൊപ്പം തൂക്കമില്ലായ്മ, പനി, ചര്‍മത്തില്‍ തടിപ്പുകള്‍, തൊണ്ടവേദന, കഴുത്തിലെ ഗ്രന്ഥികള്‍ക്കു വീക്കം, മൂത്രത്തിനു കടുത്ത നിറം എന്നിവ കണ്ടാല്‍ ഗുരുതരരോഗ സൂചനകളായി കണ്ട് ഡോക്ടറെ കാണിക്കണം. വിളര്‍ച്ച, അസിഡിറ്റി പ്രശ്നങ്ങള്‍, ആരോഗ്യപ്രശ്നങ്ങള്‍ തുടങ്ങി നിരവധി അസുഖങ്ങള്‍ കുട്ടികളെ ഇതുമൂലം ബാധിച്ചേക്കാം.
തൂക്കം പെട്ടെന്നായാലും പതുക്കെയായാലും കുറയുന്നത് പല രോഗങ്ങളുടെയും ലക്ഷണമാകാം. വയറിളക്കവും ഛര്‍ദിയും പോലുള്ള രോഗങ്ങളാണ് തൂക്കക്കുറവിന്റെ വളരെ സാധാരണമായ കാരണങ്ങള്‍. എന്‍സൈമുകളുടെ ഉല്‍പാദനം കുറയുന്നതുകൊണ്ടു ചില ഭക്ഷണങ്ങളോടുള്ള അലര്‍ജി, ഫാറ്റ് ഇന്‍ടോളറന്‍സ് എന്നിവയും തൂക്കക്കുറവും വയറ്റിളക്കവും ഉണ്ടാക്കാം.
